Voertaal: Nuwe Afrikaans-Nederlandse webwerf

31 Januarie 2018

"Al die lande het te make met multikulturele samelewings. Universiteite in Europa sukkel met dieselfde dinge as SA universiteite... daar is baie temas op die webwerf wat almal aangaan. "- Etienne van Heerden (LitNET) oor die aanbod op die nuwe webwerf, Voertaal.

'n Opwindende nuwe Afrikaans-Nederlandse webwerf, Voertaal, is op 24 Januarie bekendgestel. Hierdie webwerf is die gesamentlike handevat-inisiatief van die Stichting Zuid-Afrikahuis Nederland en LitNET. Die webwerf verskuif grense deur die deel van kennis en die skep van 'n bewustheid oor interessante raakpunte tussen Nederland, Vlaandere, die Karibiese gebied wat Indonesië betrek en natuurlik, Suid-Afrika. Die lande het geskiedkundig 'n nou verbintenis en Voertaal skep geleentheid vir gesprek. Hierdie verbintenis en die storie van Afrikaans soos dit op drie kontinente ontwikkel het, word ook vertel in W.A.M. Carstens en E.H. Raidt se boek, Die storie van Afrikaans uit Europa en van Afrika. Deel 1 belig Afrikaans se Europese verlede en in Deel 2, Die Afrikageskiedenis van Afrikaans, wat eersdaags verskyn, kom Afrikaans se Afrikaverlede aan die beurt.

Enigiemand wat Nederlands praat of verstaan kan hier interessante gesprekke volg, 'n oorsig kry oor nuusgebeure en Afrikaanse stemme hoor oor sake wat die politieke landskap beȉnvloed. Hier kan mense wat Nederlands praat hul kennis oor Suid-Afrika en Afrikaans verbreed.

Heindrich Wyngaard

Mike van Graan

Martie Meiring

Menán van Heerden

Die redaksie bestaan uit 'n verskeidenheid onafhanklike joernaliste wat artikels oor 'n breë spektrum aanbied. Mense soos Heindrich Wyngaard, Mike van Graan en Martie Meiring. Kultuur, literatuur, geskiedenis, politiek, toerisme en selfs die kookkuns word gedek. Die webwerf plaas ook daagliks kort, aktuele berigte sodat die leser op hoogte van die jongste nuuskwessies kan bly. So kan jy byvoorbeeld aan die een kant lees oor die Staatskaping, maar terselfdertyd ook oor die musieklegende, Hugh Masekela, wat onlangs oorlede is.

Op 'n ligter trant

Die webwerf bespreek darem nie net ernstige sake nie en lesers kan uitsien na interessante stories wat strek van wolwe tot Kaap-Maleise kookkuns.

Vir diegene wat belangstel in woorde en graag hulle woordeskat aanvul met woorde soos poenankies, nxa, aweh en so meer, is Menán van Heerden se artikel oor die lekker Afrikaanse woordeskat, waarin sy meer vertel oor woorde wat geleen is vanuit Standaardafrikaans, Kaaps, Oranjerivierafrikaans en Oosgrensafrikaans en wat deesdae algemeen in gebruik is, lekker leesstof.

Lees ook meer in Jo Prins se artikel oor Voertaal hier.