Werksessie oor nuwe AWS by Taalmonument – 19 Oktober 2017

11 Oktober 2017

Werksessie oor nuwe AWS by Taalmonument

As jy verward is oor die verskil tussen ‘handvol’ en ‘hand vol’, nie weet wat ‘n ‘hommeltuig’ of ‘googleloer’ is nie of nog altyd trappe van vergelyking en afstandsamestellings beter wou verstaan, is hierdie werksessie (en die Afrikaanse Woordelys en Spelreëls) beslis vir jou.

Alle Afrikaanse taalpraktisyns word hartlik uitgenooi om saam met Gerhard van Huyssteen, voorsitter van die Taalkommissie, om ‘n tafel te sit en touwys gemaak te word oor die veranderinge in die nuutste, omvattende Afrikaanse Woordelys en Spelreëls (AWS).

Gerhard sal bygestaan word deur Jana Luther, ‘n lid van die eindredaksie van hierdie lywige handleiding van meer as 800 bladsye (ook elektronies beskikbaar) wat deur die Suid-Afrikaanse Akademie vir Wetenskap en Kuns se Taalkommissie saamgestel is.

Hierdie opwindende 11de uitgawe van die ‘taalbybel’, wat ‘n eeu gelede vir die eerste keer verskyn het, bevat onder meer:

  • die nuutste nuutskeppings;
  • nuwe woorde uit Afrikaans se gebruiksvariante;
  • duidelikheid oor die gebruik van leestekens; en
  • ‘n lys Oosterse plekname en name van elemente in die periodieke tabel.

Wanneer?

Die werksessie vind op Donderdag, 19 Oktober 2017, vanaf 09:00 tot 13:00 by die monument op Paarlberg plaas en kos R50 per persoon. Koffie/tee is ingesluit en kursusgangers kan hul eie middagete bring of bestel by Volksmond Koffiewinkel op die perseel. Daar word aanvaar dat die kursusgangers bekend is met die reëls soos vervat in die vorige, ‘groen’ AWS. Kursusgangers wat reeds die nuwe uitgawe het, behoort groter nut uit die werksessie te kry. Plekke is beperk, dus bespreek asseblief vroegtydig by Nkita Pietersen op 021 872 3441 of e-pos student@taalmuseum.co.za.

Lees ook:
Meer as ’n miljoen woorde in Afrikaans
AWS – die lig in jou taaltonnel